熱刺簽南韓18歲天才　同孫興民拍住上

正進行亞洲之旅嘅英超勁旅熱刺，繼續全力開發南韓市場，據報佢哋已傾掂簽入FC江原嘅18歲翼鋒楊文赫，有消息指呢位南韓「最佳新人」轉會費約400萬歐元，將會同大師兄孫興民拍住上。

轉會權威記者Fabrizio Romano爆料：「楊文赫加盟熱刺完成，呢位2006年出生嘅FC江原翼鋒已預約體測，之後就會同熱刺簽長約，預計會喺2025年1月正式歸隊。」

楊文赫被譽為南韓明日之星，喺4月至6月連奪3個月韓職每月最佳新人，今季為FC江原上陣24場聯賽入7球。熱刺周六(27日)喺日本對神戶勝利船後，下周三(31日)會喺南韓對韓職明星隊。