班夫韋迪拒絕續約　曼聯機會來了

愛華頓中堅班夫韋迪獲得曼聯垂青，由於會方「吊高嚟賣」，令呢位22歲新星成「魔」遇阻，根據英國《每日郵報》爆料，班夫韋迪要求陷入財困嘅愛華頓開出同曼聯一樣16萬鎊(約160萬港元)周薪，否則就唔續約，擺明玩嘢想走人。

據悉曼聯2次報價收購班夫韋迪，都被愛華頓拒絕，因為「拖肥糖」企硬要求7,000萬鎊(約7億港元)轉會費，遠高於曼聯最近開出嘅5,000萬鎊，令交易瀕臨告吹。班夫韋迪似乎亦想轉投大球會，要求愛華頓提供16萬鎊周薪，相等於曼聯開出嘅薪酬待遇，否則唔會續約，擺明睇死愛華頓無力負擔呢個人工數額，逼使會方出售佢。

班夫韋迪現時周薪為7萬鎊，要求大幅加人工超過1倍，未免獅子開大口，由於佢仲有3年合約在身，相信愛華頓唔會輕易讓步。