唔要久保建英　利物浦真正目標係古達斯

日本傳媒早前指利物浦計劃收購皇家蘇斯達進攻主將久保建英，作為穆罕默德沙拿接班人，但會方其後否認，根據英國《鏡報》爆料，紅軍真正目標係韋斯咸翼鋒古達斯，皆因呢位即將24歲嘅加納國腳位置及踢法比較接近沙拿。

身高1米75嘅古達斯同沙拿一樣都係短小精悍、腳法細膩，擅長於個人突破嘅球員，而且古達斯上年夏天由阿積士轉投韋斯咸之後，迅速適應英超風格，上季聯賽上陣33場入8球及6次助攻，利物浦簽入佢，可以「即食」，風險低過簽久保建英。

不過，利物浦想收購古達斯，並非易事，因為曼聯、車路士、巴塞隆拿都睇中佢，預料會展開一場激烈搶人才大戰，呢位翼鋒毀約金為8,500萬鎊(約8.5億港元)，韋斯咸肯定吊高嚟賣。