熱身賽都冇得踢　阿迪達暗示伊美路維將離隊

阿仙奴上場熱身賽同般尼茅夫打和1比1，身穿10號球衣嘅中場伊美路維長坐後備席睇波，並冇上陣，賽後領隊阿迪達暗示呢位24歲球星可能離隊。

阿迪達被傳媒問到伊美路維前途時，佢話：「內部有事情進行之中，所以決定唔畀佢(伊美路維)參加比賽。」伊美路維年少得志，其中2021/22年球季踢33場英超入10球及2次助攻，一度備受睇好可以成為兵工廠未來10年骨幹人物，但係伊美路維近2季受到傷患問題困擾，上陣時間大減，合共只有25次披甲，而且復出之後水平大不如前，已經淪為後備。

伊美路維為咗拯救足球事業，希望轉投其他球會，盛傳富咸願意以破球會轉會費紀錄3,700萬鎊(約3.7億港元)收購佢，阿迪達可能為免伊美路維受傷，影響交易，所以熱身賽收起佢。