迪基亞復出在望　獲推薦去意甲

迪基亞上年夏天約滿離開曼聯之後，一直未有班落，近日不斷傳出呢33歲西班牙鋼門即將復出，根據《天空體育》最新報道，迪基亞好大機會加盟意甲球隊熱拿亞。

由於熱拿亞正選門將祖斯馬天尼斯早前轉投國際米蘭，會方急需要簽入新門將，有中間人推薦迪基亞畀熱拿亞，熱拿亞管理層正在考慮之中，因為迪基亞已經超過1年冇參加比賽，會方擔心佢無法重拾最佳狀態。

英國傳媒早前爆料，指迪基亞原本想等坦哈格離開曼聯之後，重投紅魔鬼，但呢位荷蘭名帥已經續約，令佢回巢無望，加上迪基亞唔想為曼聯以外嘅英超球隊效力，轉戰意甲可能係唔錯選擇。

迪基亞早前喺社交網「發貼」，簡單顯示一個「沙漏」圖案，引起唔少猜測，普遍網民認為佢正在為復出作最後倒數。