約羅進駐豪宅　格連活特做「包租公」

早前加盟曼聯嘅18歲法國新星約羅，簽約5年後立即喺曼徹斯特物色落腳地方，據報佢最近正式租住柴郡一間豪宅，而「包租公」竟然係剛離開曼聯嘅格連活特！

英國《太陽報》報道，約羅將入住柴郡Bowdon一間價值200萬鎊豪宅，屋主就係最近轉會馬賽嘅格連活特，月租為14,000鎊，豪宅有6間連廁所嘅套房，亦有迷你影院、酒吧、車房同健身室，而且仲有電子保安系統同閉路電視等等。

格連活特喺升上曼聯一隊後，即買入呢間位於Bowdon嘅豪宅，但佢之後事業運麻麻，2022年1月就因捲入家暴醜聞，喺屋內被警方拘捕，呢間豪宅亦係「案發現場」。