哥迪奧拿開腔想續約　英格蘭死心吧

曼城領隊哥迪奧拿只剩下1年合約，盛傳英格蘭足總有意明夏聘請呢位53歲西班牙名帥接手領軍，爭奪2026年世界盃。不過，哥帥最新接受傳媒訪問時，透露希望同「藍月亮」續約，間接拒絕「三獅兵團」邀請。

哥迪奧拿近日被問到去留問題時，佢話：「我講過距離離開曼城嘅日子愈來愈近，但冇講過要離開曼城，我絕對唔排除會續約，但希望先諗清楚，續約是否於我及球員都係一個好決定，我真係好愛曼城，好想留隊。」

哥迪奧拿2016年執教曼城以來，已經協助球隊奪得6次英超、2次英足盃、4次英聯盃、1次歐聯、1次世冠盃冠軍等多項錦標，其中以2022/23年球季成為歐聯、英超、英足盃「三冠王」最威水，所以傳出哥帥準備功成身退。

英格蘭連續2屆歐國盃屈居亞軍，領隊修夫基辭職之後，有傳英足總希望請哥迪奧拿領軍，協助「三獅兵團」打破超過半世紀錦標荒，但以目前情況睇，恐怕如意算盤打唔響。