曼城公布第3作客球衣　艾華利斯做模特兒留隊？

曼城公布新一季第3作客球衣，以深紅色為主色，同傳統「藍月亮」形成強烈對比，盛傳打算今夏離隊嘅前鋒祖利安艾華利斯，有份擔任新波衫模特兒，莫非已經改變主意留隊？

曼城正在紐約準戰周日(28日)早上熱身賽對AC米蘭，順便發布新一季第3作客球衣，除咗祖利安艾華利斯、魯賓戴亞斯、高華錫等球員擔任模特兒之外，領隊哥迪奧拿亦粉墨登場。據悉曼城採用呢款球衣設計，包含球場內外不斷發展、進步精神。

哥迪奧拿喺記者會上被問到組軍問題，佢話：「下季維持現有陣容嘅可能性超過85%。」近期有傳祖利安艾華利斯、奇雲迪布尼、門將艾達臣摩拉斯可能今夏離隊，根據哥帥言下之意，應該有信心留住呢3位猛將。