無人機醜聞！FIFA出辣手　加拿大女足被扣6分

奧運女足早前爆出無人機竊對手軍情醜聞，國際足協(FIFA)周日(28日)就事件狠出辣手，重罰加拿大女足今屆巴黎奧運扣6分，主教練普利斯特曼等3名教練被停賽1年。據報加拿大足總將會向奧運體育仲裁法庭上訴，加拿大女足衞冕之路困難重重。

加拿大女足首場分組賽賽前爆出偷拍醜聞，被新西蘭指控使用航拍機，喺球場上空拍攝球隊訓練，主帥普利斯特曼日前已被停職，不過FIFA仍然決定嚴懲，宣布加拿大女足今屆分組賽扣6分，並且罰款20萬瑞士法郎，普利斯特曼以及助教林巴迪、曼達3人都被禁止參與足球活動1年。

巴黎今屆設立專為奧運而設嘅體育仲裁法庭，加拿大足總發言人證實會考慮提出上訴。如果上訴失敗，上屆勇奪奧運金牌嘅加拿大女足，必定要贏晒3場分組賽，希望3分足夠令佢哋成為其中一支最佳第3名，晉級8強賽事。加拿大女足喺A組首仗2比1贏新西蘭女足，周一(29日)凌晨將會硬撼法國女足。