車路士慘敗　馬利斯卡噩夢開局

英超勁旅車路士今夏重建，不過意大利主帥馬利斯卡上任後有個噩夢開始，美國之旅首戰只能2比2逼和英甲球隊域斯咸後，周日(28日)凌晨面對蘇超冠軍些路迪，更以1比4慘敗而回。馬利斯卡賽後承認球隊未必能夠以最佳狀態迎接英超開鑼。

車路士今仗強陣出擊，尼干古、梅迪歷、列斯占士等主力悉數上陣，主攻踢法製這到23次攻門，不過防線就錯漏百出，上半場已連失2球。76分鐘更有法國中堅班洛特巴迪亞舒利「送禮」，直接「助攻」對手射入；3分鐘後車路士中場斷纜被打反擊，再失1球輸到0比4。車仔要去到完場前1分鐘，先至由尼干古憑12碼破蛋，輸得冇咁肉酸。

馬利斯卡領軍2仗成績1和1負，佢賽後表示：「戰果係重要，但分析需要宏觀，控球嗰陣我哋比上場踢得好10倍，冇波在腳當然有好多地方要改善，但呢個係必經過程。」車路士喺英超首仗就要對曼城，馬利斯卡承認未必可以最佳狀態迎接：「我哋會做好準備，至少表現會有改善，但我唔會預期第1場正式比賽就乜都搞掂，呢個期望好難實現。」