安迪歷亮相皇馬　美夢成真變「大喊包」

皇家馬德里今夏最矚目增兵，非法國前鋒基利安麥巴比莫屬，不過巴西新進國腳安迪歷同樣來頭唔細，佢周六(27日)喺巴拿貝球場首度亮相，獲43,000球迷到場熱烈歡迎，呢位18歲小將美夢成真，更忍唔住即場變「大喊包」！

皇馬早喺2022年底，已經用7,200萬歐元天價收購當時只得16歲嘅安迪歷，但要等到今個夏天18歲先正式加盟。周六喺亮相會受到43,000球迷歡迎，安迪歷表示：「好瘋狂！我依家好開心，由細路仔開始我就支持皇馬，依家我會為皇馬上陣，我唔知有咩詞語可以形容依家嘅感受，代表皇馬係個夢，依家成為現實。」

安迪歷喺亮相會入面心情激動，聽到球迷不斷高呼「加油馬德里」後，佢更感動到即場爆喊，不斷用手同紙巾抹眼淚。只係過咗18歲生日1個星期嘅安迪歷，已經10次為巴西國家隊上陣，今年3月友賽英格蘭一箭定江山係佢首個巴西國家隊入球，前途無限。