【有片】熱身賽變「拳擊賽」　網民：精彩過場波

去片睇莫林比、森美哥斯達揮拳互毆

https://twitter.com/i/status/1817187572478546062　

周六(27日)晚季前熱身賽，英冠球隊西布朗對西甲球隊馬略卡，同場加映「拳擊賽」，雙方球員莫林比、森美哥斯達先而口角，繼而動武，揮拳互毆，似足打拳擊賽。

今場波原本戲碼一般，但踢到39分鐘出現罕見一幕，西布朗中場莫林比、馬略卡中場森美哥斯達發生口角，先係互相頭頂頭爭吵，森美哥斯達沉唔住氣，率先出手打對方，莫林比亦不甘示弱，連環出拳還擊，兩人扭作一團倒場，隊友立即介入分開佢哋。

可能由於係熱身賽，球證並冇出示紅牌，莫林比踢完上半場就被換走，未知會否受內部處罰。至今場波，馬略卡小勝1比0。

「拳擊片段」喺網上瘋傳，有人話：「熱身賽都咁激，使唔使呀？」、「友誼賽好唔友誼」、「好耐未見過球員場上打架」、「衝突精彩過場波」。