阿仙奴點樣破「二奶命」？阿迪達神回應

阿仙奴連續2季屈居曼城之下，成為英超亞軍，領隊阿迪達最近被傳媒問到，兵工廠新一季點樣打破「二奶命」，奪取聯賽冠軍，佢神回應話，贏晒全季比賽，就一定捧盃。

阿迪達話：「攞足114分(3分X38場)，如果我哋做到，就一定可以奪得聯賽冠軍，我哋新一季以全勝為目標。」阿仙奴過去2季英超分別取得84分、89分，正在不斷進步，上季只係輸曼城2分，雙方兩循環交鋒，兵工廠取得1勝1和，阿迪達教波能力愈來愈接近師傅哥迪奧拿，阿仙奴新一季絕對有能力打破曼城過去4季壟斷英超錦標局面。

另外，阿仙奴為咗增強爭標實力，計劃收購巴塞隆拿翼鋒拉芬夏比洛尼，呢位27歲巴西國腳上季各項賽事上陣37場入10球及11次助攻，加上曾經效力列斯聯2季，表現出色，證明有力喺英超立足，兵工廠希望以4,000萬鎊(約4億港元)以內轉會費收購拉芬夏比洛尼。