羅馬執到寶　平價簽西甲神射手

根據「轉會權威」記者羅曼諾(Fabrizio Romano)爆料，上季西甲神射手得主多夫碧已經同意由基羅納轉投羅馬，雙方將會簽約5年，據悉今次轉會費僅3,000萬歐元(約2.54億港元)，羅馬真係執到寶。

有關多夫碧加盟羅馬已經傳咗一段時間，最新消息指羅馬方面已經同多夫碧達成個人待遇協議，羅馬下一步會同基羅納傾轉會費問題，預料3,000萬歐元可以成交。基羅納上年夏天只係用775萬歐元(約6,600萬港元)買入多夫碧，僅1年時間就獲得數倍回報，認真和味。

多夫碧上季西甲上陣36場入24球，以1球優勢力壓維拉利爾前鋒阿歷山大索洛夫，獲得神射手殊榮，並有份為烏克蘭出戰今屆歐國盃。

基羅納亦為多夫碧離隊做準備，將借用熱刺前鋒拜恩基爾，填補鋒線空缺。