一個原因　坦哈格預言福仔新一季入波30+

曼聯前鋒拉舒福特上季各項賽事上陣43場僅入8球，但領隊坦哈格預言，呢位26歲英格蘭球星新一季可以射入30球以上，因為球隊早前請來紅魔鬼傳奇射手雲尼斯達萊回巢擔任助教，相信呢位荷蘭同胞可以指導提升福仔射術。

坦哈格話：「雲尼斯達萊來投原因好清楚，佢可以幫助我哋前鋒提升水準，例如拉舒福特，其實拉舒福特好有能力，球員生涯已經入好多波，我有100%信心佢可以好似兩年前一樣。」

拉舒福特曾於2022/23年球季上陣56場入30球，但上年夏天續約，獲得32.5萬鎊(約325萬港元)周薪後，表現立即走晒樣，並出現紀律問題，包括因為夜蒲導致缺席操練，而遭到會方處罰，至於新一季能否重生，大家拭目以待。

至於雲尼斯達萊球員時代曾經為曼聯上陣219場入150球，以佢嘅資歷，絕對係曼聯現時各位前鋒嘅最好學習對象。