【有片】奧拿拿讀心術 精彩心理戰成熱話
2024年07月29日 12:00
東網電視
更多新聞短片
奧拿拿嘅心理戰充滿娛樂性。
曼聯周日(28日)喺美國同阿仙奴踢熱身賽，雖然法定時間輸1比2，不過完場後加插嘅互射12碼環節，門將奧拿拿就成為主角！呢位喀麥隆門將喺鬥法期間，兩次同對手大玩心理戰，故意企「大細邊」，並主動邀請對手射佢嘅大位，精彩戰術即成網民熱話！
奧拿拿喺呢場熱身賽表現神勇，去到互射12碼環節，更撲出夏維斯嘅射門成為「贏波」(12碼贏4比3)英雄。賽後奧拿拿心理戰影片網上瘋傳，佢喺首輪面對法比奧韋拉射門前，專登企「大細邊」讓出自己左手大片空位，並且用雙手指向左邊「邀請」對方射門，可惜法比奧韋拉並唔領情，地波射向另一邊，令奧拿拿捉錯路。
奧拿拿VS加比爾馬加希斯：https://twitter.com/i/status/1817481419792306378
奧拿拿之後重施故技，面對加比爾馬加希斯主射再做同一套動作，今次加比爾馬加希斯就非常「聽話」，直接狂抽奧拿拿左手網頂，可惜奧拿拿就撲咗去右邊。雖然兩場心理戰都捉錯路，但奧拿拿都係12碼贏波英雄，而且仲帶畀觀眾無限歡樂。