【官宣】華拉尼加盟科木：欣賞法比加斯

意甲新升班球隊科木夏天大展拳腳，周日(28日)宣布獲法國中堅華拉尼自由身加盟，雙方簽約2年，另有1年續約條款。31歲嘅華拉尼簽約後表示對科木嘅計劃「非常興奮」，亦好欣賞教練法比加斯嘅足球哲學。

華拉尼離開曼聯後，立即收到科木聘約：「最初我想睇下科木有乜計劃，愈睇就愈覺得特別、愈研究就愈覺得有趣，令我對未來有新嘅方向，所以我將加盟科木擺喺第1位，好開心可以順利加盟。」

對於科木教練法比加斯，華拉尼同樣有讚冇彈：「我同法比加斯再見面，好開心今次唔係作為敵人，我好欣賞佢對足球嘅熱誠同佢嘅足球哲學，所以我哋互相理解，希望可以為球隊帶嚟好成績。」

科木升上意甲後積極招兵，夏天已簽入前意大利國腳前鋒比洛迪、西班牙門將連拿同後衞艾拔圖摩蘭奴。