伊藤洋輝重傷長抖　拜仁仲放唔放迪歷特？

德甲勁旅拜仁慕尼黑今夏羅致日本中堅伊藤洋輝，點知佢喺周日(28日)1比1打和FC迪倫嘅熱身賽受傷，據報呢位25歲球星蹠骨骨折，將要休戰2至3個月時間。伊藤洋輝突然重傷，甚至影響埋曼聯收購拜仁中堅馬菲斯迪歷特嘅計劃。

伊藤洋輝喺6月由史特加過檔，轉會費達3,000萬歐元，對FC迪倫嘅熱身賽傷出後，原本以為冇乜大礙，但檢查後發現蹠骨骨折，拜仁體育總監艾保爾表示：「伊藤洋輝出現骨折，將要長時間休息。」消息指伊藤洋輝養傷時間約2至3個月。

拜仁一直斟介利華古遜中堅莊拿芬泰希，但隨住伊藤洋輝重傷，轉會計劃可能有變，轉會權威Fabrizio Romano報道，拜仁除主要目標莊拿芬泰希之外，仲想簽多1個中堅。拜仁本來將荷蘭中堅馬菲斯迪歷特掛牌，曼聯亦非常有興趣，但就唔肯迎合拜仁要求嘅5,000萬歐元叫價，依家拜仁中堅短缺，相信更加唔會割價兜售。