女友坐男子大髀　耶馬疑「戴綠帽」即分手

西班牙17歲新星拉明耶馬，今個月帶領「狂牛兵團」贏得歐國盃冠軍，捧盃嗰陣仲同女友柏迪娜大曬恩愛。不過西班牙傳媒爆料，柏迪娜日前被影到喺夜店，坐喺另一男子大髀上，片段瘋傳爆出出軌疑雲，疑似「戴綠帽」嘅耶馬亦喺IG「取消關注」柏迪娜。

西班牙喺歐國盃決賽贏英格蘭後，柏迪娜同耶馬家人一齊落場慶祝，最近亦齊齊飛去米蘭同希臘度假，點知西班牙《世界體育報》爆料，指耶馬已經喺社交網取消對柏迪娜嘅關注，柏迪娜同樣Unfollow兼刪除所有相片，似乎已經分手。

兩人突然斬纜，估計同最近一段社交媒體直播影片有關，片中一名男子喺夜店開直播，柏迪娜就坐喺一個叫費南迪斯嘅男仔大髀上面，當時柏迪娜仲被錄到講咗句：「停呀！你會累死我！」直播隨即結束。