艾華利斯再暗示離隊　奧運後決定去向

祖利安艾華利斯被視為世界最佳年輕前鋒之一，不過佢喺曼城就活喺艾寧夏蘭特陰影之下，據報呢位阿根廷國腳已提出轉會要求。正為阿根廷出戰巴黎奧運嘅祖利安艾華利斯，日前再次表達對自己喺曼城角色嘅不滿，表明奧運之後會認真考慮去向。

24歲嘅祖利安艾華利斯表示：「上季我係曼城上陣時間最多球員之一，不過事實係，你唔會鍾意喺最重要嘅比賽入面做後備，我想落場作出貢獻。我未諗清楚自己想點，等到奧運會完結，我會用時間考慮清楚自己想點做。」

據報曼城唔希望失去祖利安艾華利斯，正遊說佢繼續留隊，而西甲勁旅馬德里體育會就虎視眈眈。由於奇雲迪布尼、艾寧夏蘭特上季先後長期受傷，祖利安艾華利斯有36場聯賽上陣係全隊之冠，不過英足盃決賽、歐聯8強對皇家馬德里等大戰都冇份踢正選。