中國隊贏混雙金牌　61歲「乒壇嫲嫲」有功勞

【記者余樂詩巴黎直擊】巴黎奧運乒乓混雙決賽，中國組合王楚欽／孫穎莎以4比2擊敗北韓組合李鄭息／金琴英奪金牌，原來呢塊金牌「嫲嫲球手」倪夏蓮都有功勞。

採訪乒乓賽事期間，記者野生捕獲呢位「嫲嫲球手」，佢話：「中國隊加油，我永遠是你們的後盾。」佢又話自己做孫穎莎陪練員，仲喺社交平台出片講解點樣幫中國隊攞呢塊金牌。

原來中國隊混雙決賽嘅對手，其中北韓女球手金琴英嘅打法，同「嫲嫲」一樣，係長膠打法，所以決賽前夕，中國隊特別邀請倪夏蓮，擔任中國混雙組合嘅陪練。

「嫲嫲」表示：「自己有責任去幫中國隊，所以毫不猶豫答應，因為當初自己都係國家培養，依家只係為國家出一分力。」

倪夏蓮周三(31日)下午5時，就會喺女單32強對孫穎莎，兩人喺2018年嘅多哈世巡賽曾交手，當時孫穎莎贏4比1。