車仔賣「隊長」　干拿加歷查將投馬體會

根據「轉會權威」記者羅曼諾(Fabrizio Romano)爆料，車路士已經接近同馬德里體育會達成協議，同意以3,500萬至4,000萬歐元轉會費，將中場干拿加歷查出售畀呢支西甲球隊，但要等干拿加歷查同馬體會傾掂個人待遇條款，先至可以成事。

車路士近年收購多位球員之後，面臨沉重財政壓力，甚至可能違反英超公平財政條例，所以今夏頻頻出售球員，包括正式賣走伊恩馬特臣、賀爾等人，合共獲得8,800萬鎊進帳(約8.8億港元)，但仍未夠，計劃出售埋干拿加歷查。

呢位24歲英格蘭國腳只剩下1年合約，車仔方面希望盡快「甩手」，以免明夏人財兩失，欣然接受馬體會開出嘅3,500萬至4,000萬歐元轉會費。

車路士正副隊長列斯占士、芝維爾上季有唔少時間養傷，由干拿加歷查擔任隊長，並有不俗表現，馬體會由5月開始一直力斟干拿加歷查，但佢對於是否離開英超存在猶豫，如果馬體會要簽入呢位猛將，相信要提供一份肥約，釋除佢嘅疑慮。