又有亞洲兵進軍英超？李城力斟旗手怜央

近年愈來愈多亞洲球員登陸英超後有出色表現，引來各大球會注意，根據英國《每日郵報》爆料，來季重返英超嘅李斯特城計劃簽入亞洲兵，目標直指效力些路迪嘅日本國腳旗手怜央。

據悉李斯特城領隊谷巴認為球隊新一季要保住英超席位，就必須加強中場人腳實力，並睇中旗手怜央。呢位26歲中場2022年由川崎前鋒加盟些路迪之後，有出色表現，至今合共上陣87場入16球及19次助攻。

旗手怜央技術全面，唔只司職中場，仲可以客串右後衞，踢法攻守兼備，所以些路迪上年9月決定同佢續約至2028年夏天，如果李斯特城要簽入旗手怜央，估計起碼要開出1,500萬鎊(約1.5億港元)轉會費，先至有機會令些路迪放人。