雲佬訓練方式獲好評　將來取代坦哈格？

雲尼斯達萊早前回巢曼聯擔任助教，英國傳媒指呢位荷蘭傳奇射手嘅訓練方式獲好評，甚至已經代替領隊坦哈格，主持日常操練，話唔定將來有機會坐正主帥之位。

根據英國《衞報》報道，曼聯多位球員對於「雲佬」提出嘅管理及訓練方式，感到印象深刻，唔夠3星期已經提升球員能力，中堅莊尼伊雲斯話：「雲尼斯達萊非常關注球隊防守過程。」

英國傳媒早前指曼聯聘請雲尼斯達萊，為咗改善拉舒福特等前鋒嘅射術，但從莊尼伊雲斯所透露，可見「雲佬」唔只負責訓練進攻球員，亦兼顧防守訓練，坦哈格都高度評價呢位荷蘭同胞嘅工作能力。

現年48歲嘅雲尼斯達萊曾經擔任燕豪芬青年軍教練，2022/23年球季協助燕豪芬一隊獲得聯賽亞季及荷蘭盃冠軍，教波能力出眾，難怪網民認為，一旦坦哈格被炒，應該會由雲尼斯達萊接任領隊。