大鑊！曼聯貴價新兵拎枴杖　休戰3個月

曼聯夏天斥5,200萬鎊收購法國中堅約羅，初步表現大獲好評，不過上周日(28日)美國熱身賽對阿仙奴傷出，日前練習被影到要着保護靴同拎枴杖，曼聯周四(1日)證實呢位18歲球星蹠骨骨折，將要休戰3個月，無緣英超開季。至於丹麥前鋒海倫亦因大腿受傷，要休息6個星期。

約羅喺熱身賽未有身體接觸下受傷，原本估計可能足踝扭傷，但球隊周三(31日)練習期間，約羅就要拎住兩支枴杖，而且左腳着上保護靴，曼聯證實佢出現蹠骨骨折，養傷期將長達3個月，對新賽季部署構成重大打擊。

曼聯上季飽受「中堅魔咒」困擾，試過同一時間有6名中堅同時受傷，今夏領隊坦哈格力圖重整防線，高價簽入約羅後仲想再簽多個中堅，目標包括馬菲斯迪歷特、班夫韋特等等。可惜新援未有着落，約羅已經率先掛免戰牌。