瑪達食紅牌失控痛哭　巴西女足輸波仍闖8強

巴黎奧運女足分組賽周四(1日)結束，C組巴西女足0比2不敵西班牙女足，「女球王」瑪達上半場被逐成為罪人，佢食紅牌後即場失控痛哭，不過巴西女足有運行，以較佳得失球壓倒澳洲女足，成為兩支小組最佳第3名之一，驚險晉級8強。

巴西女足今場需要1分確保出線，上半場一直同西班牙女足抗衡，不過完半場前瑪達爭波舉腳太高踢中對手頭部，被球證直接出示紅牌，呢位38歲老將即場爆喊。踢少個嘅巴西女足下半場連失2球輸波，但仍然成為其中一隊小組最佳第3名，8強將會硬撼東道主法國女足。

第6度出戰奧運嘅瑪達，已宣布今屆係佢最後一次代表巴西出賽，曾兩奪奧運銀牌嘅佢希望首嘗金牌滋味，不過呢張紅牌就隨時係「女球王」嘅悲情結局，由於佢要喺8強賽事停賽，如果巴西女足未能闖過法國女足一關，今場紅牌就會係瑪達201場國家隊賽事最後一幕。