利物浦2比1挫阿仙奴　施洛領軍2連勝

利物浦嘅「施洛時代」開局非常順利，周四(1日)朝早嘅美國熱身之旅，以2比1擊敗英超勁敵阿仙奴，施洛領軍錄得2連勝。

利物浦仍有達雲紐尼斯、華基爾雲迪積克同阿歷斯麥亞里士打等主力未歸隊，不過一眾新人表現出色，今場面對強陣的阿仙奴不落下風，13分鐘一次精彩反擊，穆罕默德沙拿單刀射成1比0，34分鐘哈維艾利洛精彩挑傳，法比奧卡華路近門接應射入。

阿仙奴之後積極反撲，40分鐘馬田奧迪加特右路傳中，夏維斯門前快腳射入。換邊後兩隊陸續換入副選同青年軍，戰況亦轉趨平淡，最終兩隊再無入球，利物浦繼首場熱身賽1比0贏貝迪斯後，再贏阿仙奴2比1。

施洛賽後表示：「贏波係開心，但我更開心係點樣贏波，防守做得非常好。我哋有好多主力缺陣，但呢個係好機會，去睇下年輕球員面對阿仙奴會踢成點，好開心見到佢哋非常努力，而且踢得好好。」利物浦第3場美國之旅熱身賽，會喺周日(4日)對曼聯。