AC米蘭新帥有料　連贏曼城皇馬

周四(1日)早上季前熱身賽大戰，AC米蘭以1比0擊敗皇家馬德里，亦係呢支意甲傳統勁旅近10年以來，首次贏「銀河艦隊」。AC米蘭6月中宣布聘請方辛加執教，球隊近2場熱身賽分別擊敗英超冠軍曼城及西甲盟主皇馬，呢位51歲葡萄牙名帥有料到。

皇馬缺少2位進攻主力祖迪比寧咸、雲尼斯奧斯祖利亞，老將莫迪歷已經歸隊，同新加盟巴西前鋒安迪歷一齊擔任正選，但球隊整體狀態不及AC米蘭，如非門將泰拔高圖爾斯多次撲救，恐怕上半場已經失守。

換邊之後，皇馬大幅度換人，實力進一步下降，戰至55分鐘失波，AC米蘭由中場卓禾斯射入打開紀錄，A米之後仲有唔少黃金機會，包括中堅馬歷泰奧頭槌攻門中楣。

皇馬輸波之外，仲損兵折將，19歲前鋒施薩柏拉西奧斯受傷退下火線，多位隊友作出安慰，似乎傷勢唔輕。

皇馬下場熱身賽將於周日(4日)早上對巴塞隆拿，AC米蘭將於8月7日早上對巴塞隆拿。