曼聯大鑊了　拉舒福特都傷埋

周四(1日)早上「美國之旅」季前熱身賽，曼聯憑拉舒福特射入1球及1次助攻，以3比2擊敗貝迪斯，不過「福仔」傷出，加上射手海倫因傷需要抖6星期，曼聯鋒線好大鑊。

海倫缺陣，加上新簽荷蘭前鋒約舒亞舒克斯仍未歸隊，主帥坦哈格排出「無鋒陣」，由查頓辛祖擔任「假9」，防線由哈利馬古尼、域陀連迪路夫扼守中路，但開賽15分鐘就失守，門將湯希頓失誤，被貝迪斯前鋒路沙達補射入網。

不過，曼聯3分鐘後就扳平，阿密特迪亞路殺入禁區被對手侵犯，球證吹罰12碼，拉舒福特主射入網。阿密特迪亞路表現活躍，24分鐘勁射入網為紅魔鬼反超前。跟住曼聯透過角球攻勢，最後由拉舒福特橫傳畀卡斯米路射入，上半場領先3比1。

換邊之後，貝迪斯靠迪亞高洛蘭迪入波追番1球，但無阻曼聯贏波。根據「轉會權威」記者羅曼諾(Fabrizio Romano)爆料，拉舒福特疑似受傷，所以62分鐘被換走，令紅魔鬼傷兵問題面臨進一步惡化。曼聯將於周日(4日)早上熱身賽對利物浦，上演「雙紅會」。