曼城22次違規罪成　罰款200萬鎊

正受到英格蘭足總檢控115條財務違規罪名的曼城，周四(1日)被英格蘭足總罰款超過200萬鎊，不過今次處分就同財務違規無關，而係因為佢哋近2季22次違反「開波條例」。

英格蘭足總聲明表示：「曼城同意佢哋違反英超條例L.33，關於開波同比賽重開義務，有關違規涉及22/23同23/24球季多場比賽。」據報曼城喺對上2季，因為22次延遲上、下半場開波時間，當中最輕微一次只係遲開79秒，但已經要接受10萬鎊罰款，22次總計罰款達到209萬鎊。

相比起面對嘅115項財務違規指控，曼城今次被罰款只係雞毛蒜皮，「藍月亮」被控包括財務造假、拒絕配合調查等嚴重罪名，罪成嘅話可能會受到降班等重罰。曼城一直否認有任何違規行為，並喺6月份反擊，控告英格蘭嘅檢控屬於歧視行為。