芝維爾成目標　曼聯仲想簽「玻璃腳」？

曼聯今夏志切重整防線，據英國《太陽報》報道，喺車路士備受冷落嘅英格蘭左閘芝維爾，已成為曼聯收購目標之一，不過呢位27歲球星嘅傷患紀錄，就令唔少曼聯球迷擔心。

車路士新帥馬利斯卡上任後，打算轉用「閘位內切」戰術，列斯占士、馬路古斯圖喺熱身賽都出任過呢個角色，但作為傳統出擊左閘嘅芝維爾，似乎唔太擅長呢種踢法，馬利斯卡日前亦表示：「芝維爾係正宗左閘，角色定位上面仲要時間去解決，盡量幫佢搵到合適嘅位置。」

西班牙左閘古古列拿喺歐國盃表現出色，正選位置相當穩陣，芝維爾喺隊中地位大跌，令曼聯有機可乘。不過芝維爾近年不斷受傷，上季就因長期養傷只踢過13場聯賽，曼聯後防又出名容易受傷，再多個「玻璃腳」都咪話唔擔心。