迪歷特無緣拜仁亞洲之旅　等投曼聯？

拜仁慕尼黑已經抵達南韓首爾，將於周六(3日)晚同熱刺踢熱身賽，但大軍名單上並冇中堅馬菲斯迪歷特，進一步令人懷疑會方準備出售呢位荷蘭國腳畀曼聯。

拜仁多位有份踢今屆歐國盃嘅球員已經歸隊，包括甘美治、湯馬士梅拿、穆斯亞拿、紐亞，但有份為英格蘭出戰決賽嘅哈利卡尼可以繼續放假。

至於馬菲斯迪歷特亦唔見人，雖然荷蘭打入歐國盃4強，但呢位24歲中堅由此至終，並冇上陣，照計唔需要延長假期，但依然冇份參加亞洲之旅熱身賽，難免令人懷疑佢準備離隊。

事實上，近期頻頻傳出曼聯計劃收購馬菲斯迪歷特，佢亦樂意同「恩師」坦哈格再次合作，但兩間球會仍未傾掂轉會費，加上唔少拜仁球迷反對出售迪歷特，令交易停滯不前。

由於曼聯新簽中堅約羅受傷長抖3個月，會方可能會加快收購馬菲斯迪歷特。