【官宣】37歲拿尼未言退　再戰葡超

有「C朗師弟」之稱嘅拿尼同「師兄」一樣，屬於球壇長青樹，呢位37歲翼鋒未言退，並宣布重返葡超，加盟艾馬多拉，雙方簽約1年。

拿尼同C朗都係出身於士砵亭，並加盟曼聯走上成名之路，曾經協助紅魔鬼捧過4次英超及1次歐聯冠軍等多項錦標，但佢事業發展遠不及「師兄」，2015年離開曼聯之後，踢過費倫巴治、華倫西亞、拉素，亦曾重返母會士砵亭，甚至去過美職及澳職搵食，分別效力奧蘭多城、墨爾本勝利。

拿尼上季效力土耳其球隊阿達納迪米爾，上陣28場入4球，雙方今年5月解約，但佢並未打算退役，最終同意加盟艾馬多拉。

艾馬多拉只成立4年，上季首次升上葡超獲得第14位，勉強護級成功，值得一提，前曼聯左閘艾拉係艾馬多拉嘅股東，佢同拿尼曾經喺紅魔鬼做過隊友，相信係艾馬多拉簽入拿尼嘅主因。