麥卡倫離任曼聯助教　坦哈格又失1位親信

曼聯正式宣布，助教麥卡倫離任，將會執教牙買加國家隊，意味領隊坦哈格最初帶來紅魔鬼嘅3位助教已經全部離隊，加上早前加盟嘅新助教雲尼斯達萊屬於新股東拉特克利夫所推薦，令人懷疑坦哈格已經逐漸被架空。

坦哈格同麥卡倫相識多年，對於老友離隊，佢話感到可惜，並感謝對方過去2年嘅幫助。至於麥卡倫祝福曼聯奪取更多獎盃，同時認為牙買加屬於具潛力球隊，希望率領呢支中北美洲球隊創出佳績。麥卡倫曾於2006至07年執教英格蘭，今次係佢相隔17年再次擔任國家隊領隊。

值得一提，麥卡倫曾經建議前曼聯翼鋒格連活特轉為代表牙買加，呢位新星只曾為英格蘭上陣1次，仍然可以申請改為代表其他國家隊，佢本身有牙買加血統，該國足總一直希望佢「認祖歸宗」，相信麥卡倫成為牙買加主帥之後，會全力說服格連活特「轉會」。