鬥足7局！樊振東驚險反勝張本智和入4強

巴黎奧運乒乓球男單8強大戰，中國樊振東火併日本張本智和，兩人鬥足7局，樊振東在兩度落後劣勢下逼到第7局，最後逆轉4比3晉級4強。

由於頭號種子王楚欽出局，中國男單重任落在樊振東身上，但佢落手先輸2比11、9比11，落後0比2陷於劣勢。

樊振東第3局前換過件衫，果然有改善，即刻追番11比4，第4局輪到張本智和換衫，但都阻唔到樊振東攞分，再追一局11比7，局數追成2比2。

第5局張本智利發威，贏11比4，樊振東再度落後2比3，只要再輸一局就被淘汰，樊振東喺最後關頭發力，先追11比7扳平3比3，決勝局再贏11比7，驚濤駭浪反勝4比3入4強。

女單8強方面，中國孫穎莎直落4比0擊敗中華台北鄭怡靜，南韓申裕斌就以4比3險勝日本平野美宇，雙雙晉級4強。