曼聯簽鐵閘最後障礙掃除　重組阿積士防線

曼聯領隊坦哈格今夏續約後，進一步將紅魔鬼「阿積士化」，早前已經同拜仁慕尼黑鐵閘馬沙拉奧達成轉會協議，隨住雲比沙卡同意轉會韋斯咸後，曼聯終於騰出空間迎接馬沙拉奧加盟，佢會同奧拿拿、利辛度馬天尼斯重組「阿積士防線」。

摩洛哥國腳馬沙拉奧同曼聯已傾掂5年9萬鎊周薪合約，轉會費約1,500萬鎊，但轉會要等雲比沙卡離隊先可以拍板。據英國《太陽報》消息，雲比沙卡周四(1日)終於同意轉會韋斯咸，為馬沙拉奧掃清轉會最後障礙，據報雲比沙卡轉會費約1,900萬鎊。

26歲嘅馬沙拉奧曾效力阿積士4年，其中3季都係同曼聯門將奧拿拿、中堅利辛度馬天尼斯合作，據報曼聯仲想簽埋拜仁慕尼黑嘅荷蘭中堅馬菲斯迪歷特，佢亦曾經係坦哈格嘅阿積士後防核心，呢條阿積士防線有望喺英超重現。

正喺美國集訓嘅曼聯，依家仍受傷兵問題困擾，中堅約羅同前鋒海倫都受傷要休息一段時間，拉舒福特同安東尼馬菲奧斯亦喺上場對貝迪斯傷出，周日(4日)朝早對利物浦嘅熱身賽上陣成疑。(now 640周日早上7:30直播)