前李斯特城領隊因病去世　占美華迪哀悼

曾經執教李斯特城嘅英格蘭領隊格力沙士比亞，周四(1日)不敵病魔與世長辭，享年60年。李斯特城傳奇占美華迪等球員，紛紛喺社交網表示哀悼。

格力沙士比亞上年底證實患上癌症，周四喺家人陪伴下安詳離世，佢嘅家人發聲明表示：「格力沙士比亞喺所有家人陪伴下，喺屋企安詳離開，全家人都為佢嘅足球成就感到光榮，佢永遠都係受大家愛戴嘅好丈夫、好兒子、好爸爸、好兄弟同好叔叔。」

格力沙士比亞球員生涯效力過華素爾、西布朗同甘士比等球會，教練生涯成就更高，李斯特城喺15/16球季童話式奪英超冠軍，格力沙士比亞就擔任雲尼亞里嘅副手，並喺2017年擔任過李斯特城主帥。同佢共事多年嘅占美華迪得悉噩耗後，喺社交網表示：「我冇任何嘢可以講，只有極度傷心，格力安息吧！」