安迪歷首演獲大讚　傳同魯迪格鬧不和

正喺美國進行季前集訓嘅皇家馬德里，喺基利安麥巴比、祖迪比寧咸同雲尼斯奧斯祖利亞等球星未歸隊下，焦點就落喺巴西新星安迪歷身上，呢位18歲前鋒周四(1日)為皇馬喺熱身賽首演，表現獲教練安察洛堤激讚。

安迪歷喺周四對AC米蘭嘅熱身賽正選上陣，雖然皇馬輸0比1，但安察洛堤就大讚安迪歷：「佢速度好快而且好危險，可以喺狹窄空間入面靈巧突圍，呢啲能力證明佢會係個偉大球員，唔係太多球員具備呢啲才能。」

日前網上傳出一段訓練影片，安迪歷被魯迪格硬朗踢跌，之後再被魯迪格粗魯推開，因而傳出兩人不和消息，安察洛堤就回應：「魯迪格只係歡迎安迪歷啫，佢哋冇問題，麥巴比嚟到一樣會得到呢種『歡迎』，魯迪格係個好人。」皇馬美國之旅第2場賽事，將會喺星期日(4日)對巴塞隆拿。