【官宣】伊美路維加盟富咸　破兩大紀錄

兩間英超倫敦球會完成交易，富咸正式宣布簽入阿仙奴中場伊美路維，雙方簽約5年，據悉轉會費總值達到3,400萬鎊(約3.4億港元)，創下富咸史上最貴收購紀錄，同時係兵工廠最高價出售球員紀錄。

今次「破紀錄」交易之中，有2,700萬鎊為固定轉會費，另外有700萬鎊屬於浮動轉會，如果最終觸發浮動轉會條款，伊美路維身價將達到3,400萬鎊，成為阿仙奴史上最高價賣走嘅球員，幫球會帶來可觀進帳。

現年24歲嘅伊美路維屬於阿仙奴青訓產品，曾於2021/22年球季踢33場英超入10球及2次助攻，一度備受睇好可以成為兵工廠骨幹人物，但近2季受到傷患問題困擾，上陣時間大減，合共只有25次披甲，而且復出之後水平大不如前，上季19次上陣0入球，只有1次助攻，最終被阿仙奴出售。

伊美路維離隊之後，騰出阿仙奴10號球衣，盛傳原本着8號嘅隊長馬田奧迪加特可能會改着10號。