曼聯3大猛將歸隊　備戰社區盾鬥曼城

曼聯隊長般奴費南迪斯、翼鋒阿歷真度加拿祖、後衞達洛治因為有份參加今夏國際大賽，獲得延長假期，3人現時已經返回曼徹斯特操練，備戰8月10日晚社區盾對曼城。

般奴費南迪斯、達洛治協助葡萄牙打入今屆歐國盃8強，至於阿歷真度加拿祖更加係阿根廷捧美洲盃冠軍成員，為咗有充足時間休息「叉電」，佢哋都冇份參加「美國之旅」季前熱身賽，現時已抵達曼市卡寧頓訓練基地，進行簡單復操。

曼聯將於周日(4日)早上「美國之旅」最後1場熱身賽對利物浦，跟住返回英國準備出戰社區盾對曼城，換言之，般奴費南迪斯、阿歷真度加拿祖、達洛治冇踢熱身賽之下，就要上陣鬥曼城，是否有足夠狀態實屬疑問。