馬體會斟掂艾華利斯　將簽約5年

根據西班牙媒體《Tyc》爆料，馬德里體育會已經說服曼城前鋒祖利安艾華利斯加盟，雙方有望簽約5年，呢支西甲勁旅下一步會同曼城管理層討論轉會費問題，估計金額達到9,000萬歐元(約7.67億港元)。

祖利安艾華利斯因為不滿上陣時間少，盛傳佢打算離開「藍月亮」，早前有消息指呢位24歲阿根廷國腳踢完奧運後，就會決定去向，隨住阿根廷8強出局，艾華利斯可以專心處理轉會事務。

《Tyc》指馬體會董事局已經同艾華利斯嘅經理人進行多次深入談判，教練施蒙尼亦視呢位阿根廷同胞為頭號收購目標，艾華利斯被對方誠意打動，同意加盟馬體會，只要馬體會同曼城傾掂轉會費，就會簽約5年。

祖利安艾華利斯仲有4年合約在身，佢上季為曼城各項賽事上陣54場，射入19球及13次助攻，曼城起碼要求9,000萬歐元轉會費先至會放人。