祖高美斯想離隊　或成交易籌碼

根據《The Athletic》爆料，利物浦後衞祖高美斯打算今夏離隊，會方亦有意用呢位27歲英格蘭國腳作為交易籌碼，收購紐卡素翼鋒安東尼哥頓，達到雙贏局面。

祖高美斯上季為利物浦上陣51次，其中31次擔任正選，但只有2次以正選身分踢佢最喜歡嘅中堅位置，令佢感到失望，計劃轉會尋找出路。近期傳出利物浦同紐卡素醞釀2單大交易，首先係紅軍以4,500萬鎊(約4.5億港元)將祖高美斯出售畀紐卡素，再用7,500萬鎊(約7.5億港元)收購對方翼鋒安東尼哥頓。

若然成事，紐卡素既可以增加收入，以符合英超財政要求，同時獲得1位防線猛將加盟，至於利物浦可以簽到心頭好，對各方面都有利。

盛傳紐卡素急不及待，上月歐國盃舉行期間，已經聯絡英格蘭國家隊，希望喺德國為祖高美斯、安東尼哥頓進行體測，盡快完成交易，但之後卻未有下文。