贏得女雙銅牌　「千陽BB」喜極而泣

巴黎奧運羽毛球賽場驚喜不絕，日本隊連日來有位女神吸引廣大網民注視，佢就係被稱為「千陽BB」嘅27歲選手志田千陽，周六晚（3日）佢拍住松山奈未奪得銅牌，廣大網民都戥佢高興。

日本組合志田千陽／松山奈未以直落兩局21比11、21比11擊敗馬來西亞組合，贏得銅牌，志田千陽喜極而泣；兩人今屆上陣6場取得4勝2負，雖然表現唔算太好，但連日來廣受網民關注，皆因大家都鍾意睇「千陽BB」打波。

志田千陽因標緻外貌同清新氣質，喺巴黎奧運賽場爆紅，社交平台粉絲超過50萬，佢亦隨即被起底，佢2016年開始參加國際大賽，2017年同松山奈未拍檔；佢本人亦係追星族，係日本女團「乃木坂46」粉絲，多次睇演唱會，並獲得偶像鼓勵。有網民認為，經過今屆奧運，「千陽BB」都可以考慮出道。