英超開鑼預演　夏蘭特戴帽率曼城「炒車」

周日(4日)朝早熱身賽，曼城憑艾寧夏蘭特連中三元，喺美國以4比2大破車路士，兩支勁旅將喺2個星期後嘅英超開鑼戰再度交鋒，不過車路士嘅季前熱身表現就令球迷擔心。

車路士獲哥迪奧拿「徒弟」馬利斯卡執教後，重新建立「曼城風」嘅後場組織踢法，不過改變之路似乎相當漫長，比賽早段就因後防交波連番出錯，被曼城前鋒艾寧夏蘭特連入2球。下半場曼城由奧斯卡波比同艾寧夏蘭特再建功，遙遙領先4比0；車路士之後靠馬杜基同史達寧追番2球，叫做輸得冇咁肉酸。

兩隊將喺英超開鑼周首交鋒，曼城領隊哥迪奧拿就讚馬利斯卡「方向正確」：「我睇到馬利斯卡嘅諗法，我好鍾意，球場情況影響咗佢哋，返到史丹福橋，(錯誤)就唔會發生。」馬利斯卡亦指草地情況影響發揮：「草地情況令球速變慢，我唔擔心球隊嘅情況，亦唔會有咩改變，因為我哋相信自己向住完美之路前進。」