馬體會簽「夏蘭特拍檔」　莫拉達最強代替品

西甲勁旅馬德里體育會近期積極增兵，正式宣布簽入維拉利爾前鋒阿歷山大索洛夫，呢位28歲挪威國腳上季西甲入23球，僅比神射手得主多夫碧少1球，射術非常了得，成為艾華路莫拉達最強代替者。

阿歷山大索洛夫曾經效力洛辛堡、格羅寧根、水晶宮、RB萊比錫、皇家蘇斯達等多間球隊，表現唔算特別亮麗，直至上季轉投維拉利爾終於大爆發，踢34場西甲有23球進帳，演出令人眼前一亮，並成為挪威國家隊主力，同艾寧夏蘭特合組鋒線。

馬體會喺艾華路莫拉達離隊後，一直物色頂級前鋒，教練施蒙尼非常欣賞阿歷山大索洛夫，成功促使會方動用3,200萬歐元(約2.7億港元)收購佢，雙方簽約4年。阿歷山大索洛夫身高1米95，馬體會新球季可以多一招高空轟炸戰術。