阿仙奴野心勃勃　加入爭奪艾華利斯

曼城前鋒祖利安艾華利斯有意今夏離隊，引起各大豪門注意，根據英國《太陽報》爆料，阿仙奴亦加入爭奪呢位24歲阿根廷國腳，並會出售尼基迪亞、雷斯尼爾遜等副選，籌集資金打「收購戰」。

阿仙奴今夏已簽入意大利中堅卡拉科利，並買斷門將大衞拉耶，但鋒線人腳仍有待增強，特別係球隊一直欠缺1位9號「純射手」，祖利安艾華利斯無疑係合適人選。

不過，兵工廠要簽入呢位神鋒，需要面對激烈競爭，因為馬體會、車路士、巴黎聖日耳門都睇中艾華利斯，曼城可以吊高來賣，起碼要求8,000萬鎊轉會費(約8億港元)，如果阿仙奴想買到心頭好，必須出售現有球員籌集資金，日前已將中場伊美路維賣畀富咸，獲得2,700萬鎊固定轉會費，可能會再出售尼基迪亞、雷斯尼爾遜畀馬賽。

祖利安艾華利斯上季為曼城各項賽事上陣54場，射入19球及13次助攻，但佢不滿經常喺大戰做後備，因而萌生去意，如果入「廠」應該可以穩坐正選。