烏加迪獨自操練　等緊加盟曼聯

曼聯計劃收購巴黎聖日耳門(PSG)中場文路爾烏加迪，但兩間球會喺轉會費問題上，仍存在分歧，呢位23歲烏拉圭國腳踢完美洲盃之後，仍然未向PSG報到，現時身處西班牙獨自操練，似乎等緊加盟曼聯。

由於PSG將會簽入賓菲加19歲天才中場祖奧尼維斯，令原本已經不受教練安歷基重用嘅文路爾烏加迪處境更加尷尬。曼聯早前趁機出手力斟呢位中場，並同佢達成薪酬待遇條款。

不過，PSG要求7,000萬歐元(約6億港元)轉會費，比上年向士砵亭買入價多1,000萬歐元，曼聯方面認為價錢太高，導致遲遲未達成交易協議。

曼聯近期頻頻出現傷兵，包括新加盟中堅約羅長抖3個月，前鋒海倫休戰6星期，加上剛於上場熱身賽吞利物浦3蛋，仍然需要增兵提升實力，或者會加速簽入文路爾烏加迪。