【官宣】比比自由身投維拉利爾　冇壓力博翻生

西甲球會維拉利爾周日(4日)宣布，科特迪瓦翼鋒尼高拉斯比比以自由身加盟，雙方簽約2年。29歲嘅比比早前聲稱因轉會費太高，令佢喺壓力下敗走英超，今次免費轉會登陸西甲，誓要爭取表現博翻生。

比比喺5年前妁7,200萬鎊天價轉會費加盟阿仙奴，但表現未符預期，被形容為「英超最大水貨」，上年獲阿仙奴解約轉戰土超嘅特拉布宗，上陣19場入5球，呢個夏天回復自由身後，終獲維拉利爾垂青。

比比上月接受訪問，自爆喺英超失敗嘅主因，係轉會費太高而承受壓力，被傳媒針對影響信心，甚至曾經打算提早掛靴，今次佢有機會重返歐洲頂級聯賽，係證明自己嘅最好機會。