同高層反面離隊　巴夫韋迪要買起愛斯賓奴！

足球壇有個金句叫「冇任何球員可以大過球會」，不過丹麥前鋒巴夫韋迪就諗住打破定律！據西班牙《馬卡報》報道，今夏同愛斯賓奴反面離隊嘅巴夫韋迪，正計劃收購呢間新升班西甲球隊，有望以大老闆身份回歸。

愛斯賓奴上年降落西乙，巴夫韋迪曾要求離隊被拒絕，而且聲稱獲開一份「侮辱性」嘅新約，雖然呢位前鋒上季帶領球隊重返西甲，但今夏就選擇啟動離隊條款，以自由身加盟巴甲嘅甘美奧，同球會管理層完全反晒面。

據西班牙《馬卡報》報道，巴夫韋迪嘅「報復行動」唔單止係自由身離隊，佢仲計劃收購愛斯賓奴股份，有望成為球會話事人！據報巴夫韋迪身家非常豐厚，佢將踢波賺到嘅收入，同叔叔開咗間地產公司，依家市值達2.87億美元，佢老婆亦係時裝品牌老闆，兩公婆仲開自己嘅餐廳，絕對有能力收購愛斯賓奴。