迪高抵達萊比錫　巴塞簽奧莫好事近

根據「轉會權威」記者羅曼諾(Fabrizio Romano)爆料，巴塞隆拿總監迪高已經抵達德國萊比錫市，將會同德甲球會RB萊比錫，討論收購中場丹尼爾奧莫事宜，呢位26歲西班牙國腳好可能新一季重投巴塞隆拿。

據報巴塞隆拿方面上星期已經同丹尼爾奧莫達成個人待遇條款，只要落實轉會，雙方就會簽約6年，巴塞下一步將同RB萊比錫傾轉會問題。呢支西甲勁旅曾經提出以6,000萬歐元(約5.1億港元)收購丹尼爾奧莫，現時可能再加碼，誓要令RB萊比錫放人。

丹尼爾奧莫曾於巴塞隆拿青年軍受訓，其後轉投克羅地亞球隊薩格勒布戴拿模，2020年1月加盟RB萊比錫。呢位進攻中場上季為RB萊比錫各項賽事上陣25場入8球，並有份出戰今屆歐國盃，上陣6場入3球及2次助攻，成為西班牙奪冠功臣。早前曾傳出曼城計劃收購丹尼爾奧莫，但佢傾向加盟巴塞隆拿。